ILOILO CITY – Nagsugod na nga mag-abot sa probinsiya sang Antique ang pila ka mga participants sang Palarong Pambansa 2017.
Sa interview sang Bombo Radyo Iloilo, ginpahayag ni Atty. Arthur Lastimoso, legal counsel sang Antique provincial government kag chairperson sang local organizing committee, kalakip sa mga nag-abot na ang mga atleta nagikan sa Region 5 ukon Bicol kag Region 4-B ukon MEMAROPA.
Suno kay Lastimosa, ang delegasyon sang Bicol ang yara sa San Pedro Elementary kag National High School sa banwa sang San Jose.
Sa Belison Elementary kag National High School naman ang mga atleta sang Region 4-B.
Malayo ang ginbiyahe sang mga atleta kun sa diin nag-agi pa ang mga ini sa Batangas padulong sa Caticlan paagi sa RO-RO kag ginsugat sang bus nagikan sa Caticlan padulong sa Antique.
Sa masunod nga semana naman magaabot ang mga delegasyon nagikan sa Mindanao.
Suno kay Atty. Lastimoso, makompleto ang mga atleta kag coaches sa Antique pagkatapos sang Semana Santa.