ILOILO — Ginalauman nga madamo nga partido sa Western Visayas ang makipag-alyansa sa Partido Federal ng Pilipinas (PFP) kun madayon ang oath taking sang mga opisyal nga magasulod sa amo nga partido.
Sa interview sang Bombo Radyo kay Iloilo Governor Arthur Defensor Jr., regional director sang Partido Federal ng Pilipinas Region 6, iya ginpahayag nga indi lang niya pagpangunahan ang mga partido nga maga-upod sa ila bangud mahibaluan lamang ini kun madayon na ang pagpanumpa.
Suno kay Defensor, ginakalipay niya nga may mga partido nga luyag mag-upod sa Partido Federal bangud may magadugang naman nga kaalyado sang administrasyon.
Ginpahayag man sini nga lauman nga may matabo nga signing of alliance apang indi pa matumod ang schedule kun san-o ini matabo.
Nagpasalig man ang gobernador nga madayon ang oath taking sa rehiyon apang indi pa subong bangud man sa masako pa ang mga national officers sang Partido Federal sa area sang Luzon.
Nahibaluan nga sang April 10, 2024, kuntani ang oath taking ceremony sang mga bag-o nga myembro, apang nakansela ini.
