𝗜𝗟𝗢𝗜𝗟𝗢 𝗖𝗜𝗧𝗬 — Ginpa-Bombo sang isa ka pasahero ang isa ka konduktor nga ginapahayag nga nagpasakay sang masobra nga mga pasahero , rason nga indi na sila makahulag sa sulod sang modernized jeep.
Sa interview sang Bombo Radyo kay Alyas Henry, tagreklamo, iya ginpahayag nga wala ini siya una nagreklamo apisar nga ginpaisdog siya sang konduktor bangud may madugang sakay sa modern nga jeep.
Suno kay Henry, sang yara na sa Commission Civil St., Jaro, may isa ka pasahero nga nabudlayan magpanaog bangud sa dala sini nga isa ka sako nga bugas.
Apang, may duha ka mga tigulang nga nagtuyo magsakay, kon sa diin, ginpapanaog anay sang konduktor ang duha agud nga makapanaog ang isa ka pasahero nga may dala nga bugas.
Sang nakasaka na ang duha ka senior citizens, pag-abot sa Jaro Plaza, liwat nga may ginpasakay nga pasahero ang konduktor rason nga liwat sila nga ginpaisdog.
Ini man ang nangin rason sang ila pagsabtanay, kon sa diin, ginkalain sang iya buot ang paghambal sang konduktor nga “Kon nagutokan ka Sir, pwede ka gid ka panaog.”
Gin-athag naman sini nga indi lang siya ang nagkwestyon nga pasahero sa driver kag konduktor kaangot sa sobra-sobra nga pagpasakay sang mga pasahero.
Ginlaragway man sini ang nangin akto sang konduktor nga isa ka “arogante” nga klase kang pamatasan.
