Nagapati ang Dallas Mavericks guard nga si Kyrie Irving nga komunikasyon kag malaba nga pasensya ang kinahanglan agud makabawi kag malutos ang iya anay team nga Boston Celtics sa Game 2 sang 2024 National Basketball Association (NBA) finals.
Matandaan nga ginlampaso sang Boston ang Dallas, 107-89, sa Game 1 kag tuman man ka tunog ang paghikay sang fans kay Irving nga nagtapos lamang nga may 12 puntos, tatlo ka rebounds, duha ka assists, kag duha ka steals.
Ang kalutusan sang Dallas sa Game 1 amo man ang ika-11 nga tion nga nalutos si Irving sa kamot sang Celtics sa ila 11 man ka ulihi nga sambuwa halin sang 2021 season.
Apang suno sa eight-time All-Star, indi ang fans sa TD Garden, Boston ang rason sang ila kalutusan kundi ang maayo gid man nga performance sang Celtics.
Nahibaluan nga indi malimtan sang Celtics fans si Irving bangud anak ini sang Boston University basketball hall-of-famer nga si Drederick Irving kag nag-upod man mismo sa Celtics sang 2017.
Sang Oktubre 2018, nagpabutyag ini sang interes nga magpirma liwat sa Celtics kun magbukas na ang free agency window apang sang nag-abot na ang amo nga tion, wala sini gintuman ang promisa kag mas ginpili ang Brooklyn Nets sang Hunyo 2019.
Halos tunga ka dekada na ang nagligad halin sang amo nga desisyon apang matunog gihapon ang pag-boo sang Boston fans sa kada tion nga si Irving ang naga-uyat sang bola.
Baliskad naman ini sa mainit nga pag-abi-abi sang fans sa anay Mavericks star nga si Kristaps Porzingis nga subong big man na sang Boston kag nangin daku nga lyabe sa kadalag-an sa Game 1.
Naka-schedule ang ikaduha nga sambuwa sang Dallas batok sa Boston 8:00 buwas sa aga (oras sa Pilipinas) sa amo gihapon nga venue sa TD Garden, Boston, Massachusetts.
