ILOILO CITY- Ginpakigbahin sang isa ka Ilonggo nga pari kag misyonaryo kun paano magsaulog sang Paskwa ang mga tawo sa Pakistan.
Suno kay Bombo International Correspondent Father Reynel Tanalgo direkta sa Hyderabad, Sindh Province, Pakistan, apisar mayorya sang mga tawo sa Pakistan ang mga Muslim, may mga Kristiano sa gihapon nga nagasaulog sang Paskwa.
Pahayag niya, kaangay sa Pilipinas, isa ka dako nga selebrasyon man para sa mga tawo ang Paskwa humalin sa bisperas nga Disyembre 24 tubtob sa Disyembre 25 sang kaagahon ilabi na sa Punjab Province sa diin madamo sang mga Kristiano.
Apang suno kay Father Tanalgo, kun sadto, ginapakadto nila sa mga simbahan ang mga Kristiano agud nga magtambong sang misa kag magselebar, sa subong naman, sila nga mga pari nalang ang nagapadulong sa mga lugar kun sa diin nagaistar ang mga Kristiano agud magselebrar sang Paskwa.
Samtang, wala naman sang misa de aguinaldo nga ginpatigayon sa nasambit nga pungsod sa tion sang Paskwa apang gin-ako sang pari nga luyag nila nga maghiwat man sini kaangay sa Pilipinas.
