Adbokasiya na sa syudad sang Passi ang paghatag sang libre nga dugo para sa mga nagakinahanglan nga mga pumuluyo.
Sa interview sang Bombo Radyo kay Passi City Mayor Stephen Palmares, iya ginpahayag nga madugay na ginapatigayon ang mga bloodletting activities sa syudad kag ginatinguhaan gid nga mahimo ini kada bulan.
Nagalaum si Mayor Palmares nga sa bulig sang mga blood donors, wala na sang may magsala-sala kun gab-i sa tion nga kritikal ang pagkinahanglan sang dugo.
Sa Martes, Nobyembre 24, mangin kaupod sang local government unit sang Passi ang Dugong Bombo kag Philippine Red Cross kag sa Biyernes, Nobyembre 27, kaupod sini gihapon ang Dugong Bombo kag ang Western Visayas Medical Center (WVMC).
Lakip sa ginalauman nga magapadulong sa Passi City Arena amo ang Passi City College kag ang mga mangunguma.
Suno naman kay Janice Jennifer Palmares, acting president sang Passi City College, magasuporta ang faculty and staff kag mga estudyante sang nasambit nga city college sa Dugong Bombo.
Sa Nobyembre 24, 300 ang target nga successful blood donors samtang 150 naman sa Nobyembre 27.
Una na nagpasalig ang LGU nga sundon ang tanan nga minimum health protocols kun patigayunon na ang bloodletting activity sa Passi City Arena.
