PASSI CITY – Ginpaidalom na sa State of Calamity ang Passi City sa Iloilo bangud sa dengue outbreak.
Sa interview sang Bombo Radyo Iloilo kay Passi City Mayor Atty. Stephen Palmares, iya ginpahayag nga 44 sa 51 ka mga barangay sa syudad ang nakarekord sang mataas nga kaso sang dengue.
Humalin sang Enero tubtob Agusto 8, may yara na sang 327 ka dengue cases sa syudad.
Bangud sini, nadesisyunan sang Passi City Council nga magpasar sang resolusyon nga nagadeklara sa syudad sa state of calamity.
Suno kay Palmares, mahimo na nga magamit ang calamity fund sang syudad agud makabakal sang mga dengue kits kag iban pa nga makinarya agud matapna ang pagduging sa mga lamok nga amo ang ginatunaan sang dengue.
Nag-umpisa naman nga magtaas ang dengue cases kasunod sang tig-ululan.
Padayon naman ang pahanumdom sang alkalde sa publiko nga magpatigayon sang 4S strategy batok sa dengue: Search and destroy breeding places; Secure self-protection; Seek early consultation; kag Support fogging or spraying in hotspot areas.
