ILOILO CITY – Ginapabugal gid sang syudad sang Passi ang Ilonggo nga bag-o nga commanding general sang Philippine Air Force.
Si Major General Stephen Palomado Parreño ang nagdako gid sa Barangay Poblacion Ilaya, Passi City nga anak sang lunsay Passinhon kag nakapangasawa man sang pumuluyo sang Barangay Gines Viejo sang amo nga syudad.
Siya ang nag-eskwela sa Central Philippine University humalin sang kindergarten tubtob high school antes nagsulod sa Philippine Military Academy kag member sang “Sambisig” Class of 1991 kun sa diin, naga-isahanon ini nga “Starman” kag naggradwar bilang class Salutatorian.
Sang natabo ang Marawi Siege, si Parreño ang nangin Flight Commander sang C-130 flights nga padulong kag pabalik sa Guam kag Arizona agud nga magkuha sang logistics bilang bulig sa ongoing Joint Operations.
Antes ang appointment bilang ika-39 nga Commanding General, nangin Acting Vice Commander siya sang Philippine Air Force nga concurrent sa iya position nga Chief of Air Staff.
Sa interview sang Bombo Radyo kay Passi City Mayor Stephen Palmares, iya ginpahayag nga si Parreño ang naga-ulikid gid sa ila syudad kag nagapa-uli man sa tion nga may yara ini sang tyempo.
Nahibaluan nga sang Martes, Disyembre 20, 2022, pormal nga ginbuslan ni Parreño si Lt. Gen. Connor Anthony David Canlas Sr.
Ang turn over ceremony ang ginpamunu-an ni President Ferdinand Marcos, Jr. sa Villamor Airbase sa Pasay City.
