PASSI CITY – Todo na ang pagpanghanda sang Local Government Unit sang Passi City may kaangtanan sa nagahilapit nga Dugong Bombo 2020 nga patigayunon sa Don Valerio Palmares Sr. Memorial District Hospital sa nasambit nga component city sa Hulyo 22 kag 29.
Sa interview sang Bombo Radyo kay Krishna Rodriguez, blood coordinator sang “Dugo Ko, Ibulig Ko, Passinhon Ako” program sang Passi City, iya ginpahayag nga ginasigurado gid nila nga mangin hilway sa Coronavirus Disease 2019 (COVID-19) ang tanan nga magapakigbahin sa Dugong Bombo.
Suno kay Rodriguez, pagasundon ang tanan nga minumim health standards sa bulig man sang Philippine Red Cross kag sang mga medical practitioners.
Magluwas sa mga Passinhon, pagabatunon man ang walk-in donors nga nakapasar sa screening.
Suno naman sa donor recruitment officer nga si Efren Palomo, daku gid ang mabulig sang Dugong Bombo ilabi na subong nga may pandemya.
Ginpahayag ni Palomo nga wala sang dapat kahangaw-an sa pagpatigayon sang bloodletting activity bangud nga kumpleto sa equipment kag sa Personal Protective Equipment ang mga medical practitioners nga magapakigbahin.
