PASSI CITY, ILOILO – Temporaryo nga ginsirado ang Passi City Hall matapos nga may pila ka mga empleyado nga nagpositibo sa COVID-19.
Sa interview sang Bombo Radyo kay Mayor Stephen Palmares, iya ginpahayag nga nag-umpisa ang disinfection kahapon, Oktubre 26, kag magalawig ini tubtub sa Oktubre 28 samtang magapadayon ang trabaho sa Oktubre 29.
Suno kay Palmares nga humalin sang Oktubre 24, tubtub subong nga adlaw, naglab-ot sa 19 ka empleyado ang nagpositibo sa virus.
Ginpahayag ni Palmares nga ang na record nga COVID-19 cases ang bunga sang ginpatigayon nga mass testing sa mga empleyado bilang requirement sa ila pagbalik sa trabaho.
May kaangtanan diri, kanselado man ang Dugong Bombo 2020 nga patigayunon sa Oktubre 28 kaupod ang Western Visayas Medical Center bangud nga ang mga empleyado sang Passi City Government nga in-charge ang naka-quarantine matapos ginkuhaan sang swab sample para sa COVID-19 test.
Wala pa sang petsa kun san-o patigayunon ang nasambit nga bloodletting activity bangud ginahulat pa ang resulta sang RT-PCR test sang mga empleyado.
