ILOILO – Natalana nga ideklarar sang Philippine Drug Enforcement Agency (PDEA) Western Visayas bilang drug-free ang syudad sang Passi.
Ini ang ginkumpirma ni Passi City Mayor Stephen Palmares.
Sa interview sang Bombo Radyo kay Palmares, iya ginpahayag nga nalipay gid ang bug-os nga syudad sa amo nga deklarasyon nga pagahimuon sa Nobyembre 21.
Indi ini ‘overnight’ nga trabaho suno sa iya kundi ginpangabudlayan gid.
Suno kay Palmares, ini ang bunga sang ‘conglomerate elements’ sang syudad nga ginalakipan sang pagpatigayon sang community-based rehabilitation program, pag-activate sang Barangay Anti-Drug Abuse Council ukon BADAC, kooperasyon sang mga opisyal kag publiko, kag padayon nga pagmonitor sa mga drug surrenderees.
Dugang pa ni Palmares, may ara sang 230 ka mga drug surrenderees sa syudad sang Passi apang sila ang ginpaidalom sa anom ka semana nga training kag rehabilitation.
Kasunod sini, magadihon pa sang sustainable livelihood sa masunod nga semana agud mahatagan pa gid sang nagakaigu nga tikang ang mga natungdan.
Iya man ginpahayag nga sugod sa iya pagpungko, isa na sa mga specific agenda nila ni Vice Mayor Jesry Palmares ang paghimo sa syudad nga drug-free sa katapusan sang tuig.
Nahibaluan nga ang pagdeklara sang mga banwa bilang drug-free ang ginpamunuan sang Regional Oversight Committee, lakip na ang PDEA, Department of Interior and Local Government (DILG) , Department of Health (DOH), kag Philippine National Police (PNP) nga amo ang nagalantaw kon nakompleto bala sang mga banwa kag syudad ang mga requirements.
