ILOILO CITY – Nagapanguna ang Pototan kag syudad sang Passi sa probinsya sang Iloilo sa may pinakamadamo nga reported rape cases.
Sa data sang Iloilo Police Provincial Office, humalin sang 2021 tubtob 2022, may yara sang tag-21 nga kaso sang rape ang Passi City kag Pototan.
Nagasunod ang Oton nga may 20; Estancia nga may 17; kag Lambunao nga may 15.
Sa bilog nga probinsya, ang mga naga-edad 11-17 anyos ang masami biktima sang pagpanghimulos.
Sa bilog naman nga rehiyon, ang probinsya sang Iloilo ang top contributor.
Sa interview sang Bombo Radyo kay Police Major Ma. Liza Nofuente, chief sang Women and Children Protection Desk sang Iloilo Police Provincial Office, iya ginpahayag nga kadam-an sang kaso ang makabig nga incest rape ukon ang myembro man sang pamilya ang naghimulos sa biktima.
Bangud sini suno sa natungdan, nagpatigayon sila sang symposium sa banwa nga may pinakamadamo nga kaso kag ginpatpat sa mga barangay officials ang statistics sang rape sa probinsya.
Gin-discuss man ang kaso nga rape kag ang konsekwensya sini.
Ini nga symposium ang padayunon sang Iloilo Police Provincial Office sa bilog nga probinsya agud nga mas madamo pa ang makahibalo sang kaso nga rape.
Nagpanawagan man ang opisyal sa mga biktima nga indi magkahadlok ukon magkahuya sa pagsugid sa kapulisan agud nga matapna na sa labing madali nga panahon.
