PASSI CITY, ILOILO – Patigayunon na sa Byernes, Abril 23, ang ikaduha nga hugnat sang bloodletting activity sa Passi City sa bulan sang Abril.
Ini ang liwat nga pagaupdan sang Dugong Bombo sang Bombo Radyo Iloilo kag duha ka blood banks nga amo ang Philippine Red Cross- Iloilo Chapter kag Western Visayas Medical Center (WVMC) Blood Bank Center.
Ang aktibidad ang magaumpisa ‘las 7:00 sa aga sa Passi City Arena.
Sa interview sang Bombo Radyo kay Gelverth Aguilario, isa sa mga blood coordinators sang syudad sang Passi, iya ginpahayag nga 10 ka mga barangay ang magasakdag sa bloodletting activity.
250 ang target blood donors sa amo nga adlaw.
Sa Barangay Man-it Covered Gym ang inisyal nga ginpahayag nga venue apang ginsaylo sa Passi City Arena agud masunod sang husto ang physical distancing sa kapin 300 ka mga tawo nga magapadulong sa lugar.
Ipatuman sang istrikto ang iban pa nga minimum health protocols batok sa COVID-19 sa nasambit nga aktibidad.
