Pag-istorya, pagpaathag kag pag-edukar, ini ang luyag nga tutukan sang Passi City sa mga pumuluyo agud nga mapahangop ang ka-importansya sang pagpabakuna sa COVID-19 Vaccine.
Sa exclusive interview sang Bombo Radyo kay Passi City Mayor Atty. Stephen Palmares, iya ginpahayag nga madamo sa gihapon sa iya mga pumuluyo ang nagapamalibad nga magpabakuna.
Suno kay Palmares, sa iya paglibot kag pagpanalawsaw, ang mayor nga rason sang mga tawo nga nagapangindi sa pagpabakuna amo ang pagpang-alang-alang sa ka-epektibo sang COVID-19 vaccine.
Ginpahayag man ni Palmares nga nahangpan niya ang mga sentimyento sang iya pumuluyo.
Gintuad niya nga mas maayo nga antes ang Mass COVID-19 Vaccination, edukaron anay ang tanan, may kaangtanan sa ka-importansya sini sa ikaayong lawas.
Gin-athag man niya nga indi siya pabor sa ‘No Vaccine, No Work’ policy.
Ini bangud kun mangin mandatory ang pagpabakuna sa COVID-19, mas magalala lamang ang sitwasyon sa diin posible nga magaresulta ini sa kinagamo.
Sa subong suno sa natungdan, nagapasalamat man siya nga nangin manubo na ang active cases sang COVID-19 sa Passi City.
Dugang pa ni Palmares, nagdangat sadto sa 305 ang active cases sang Passi apang sa subong may yara na lamang sang 30.
Matandaan nga ginpaidalom sa Enhanced Community Quarantine (ECQ) ang Passi City sang Enero 28 tubtob Pebrero 11 bangud sa lapanagon nga pagsaka sang mga kaso sa COVID-19.
