Opisyal na nga nag-file sang kaso si Passi City Mayor Stephen Palmares batok sa 17 ka mga indibidwal nga naga-claim sang duta sa pila ka porsyon nga ginatindugan sang Passi City Hall.
Sa interview sang Bombo Radyo kay Mayor Palmares, iya ginpahayag nga wala sang legal nga pamatuod ang gina-claim sang mga nagpakilala nga myembro sang Indigenous Peoples Community nga ‘kuno’ sila ang nagapanag-iya sang 50-ektaryas nga duta nga ginapahamtangan sang city hall.
Gin-athag man sang alkalde nga indi sila lehitimo nga myembro sang Indigenous Peoples (IP) bangud wala nagaguwa ang ila pangalan sa National Commission on Indigenous Peoples.
Suno kay Palmares, ang ila gina-uyatan nga papel ang sila lamang nagpirma, apang wala sang kamatuoran nga nagapanag-iya sila sang duta nga ginapahamtangan sang city hall.
Ginatun-an man sang natungdan kon mahimo pa nga madugangan sang legal nga panumbungon ang mapasaka batok sa mga indibidwal.
Kaso nga illegal possession of fire arms, illegal assembly, direct assault, kag usurpation of real property ang ginapangatubang subong sang 17 ka mga indibidwal.
Nahibaluan nga nakuha sa ila ang service vehicle, pila ka mga calibre sang pusil: 1 ka ginapatihan 12 gauge shotgun kag mga bala, 2 ka 9 mm pistol, kag bala sang 45 caliber pistol.
