LAMBUNAO, ILOILO – Hilig kag pagkapisan ang nangin kapital sang Lutero sisters sa pagtukod sang Yamato Flower Farm sa Brgy. Cayan Oeste, Lambunao, Iloilo.
Pila lamang sa mga bulak nga mahimo makita sa Yamato Flower Farm amo ang marigold, zinnia, globe amaranth, mexican petunia, cosmos, cocks comb, celusia, sunflower kag portulaca sa diin ang mag-ulutod nga sanday Analyn Ferrariz, Ailyn Jacinto kag Adea Marie Lutero ang utok sa nasambit nga tourist destination.
Sa Good Morning Philippines program, ginpahayag sang kamanghuran nga si Adea Marie nga sila nga mag-ulutod ang mahilig sa pagtanum sang bulak tubtub nga ila naisipan nga magpatukod sang flower farm.
Ang kada isa sa ila suno kay Adea Marie ang may yara sang katungdanan agud nga mapanami ang flower farm kag lakip na ang promotion sini agud nga makaganyat sang turista.
Sa una suno kay Adea Marie, wala nangin mahapos ang proseso sa pagtukod sang flower farm bangud nga kinahanglan nila nga magpangita sang bulak nga mabuhi sa klima sang Pilipinas.
Magluwas sa pagpangita kag pagpili sang binhi, makabig nga trabahoso ang pagtanum kag pagtatap sang mga bulak, halin sa pagbunyag, pagtinlo sang duta kag kun paano mapabilin ang katinlo sang palibot.
Bilang anthophile” ukon mahuyugon sa bulak, ginpahayag ni Adea Marie nga wala siya nagapati nga may mga tawo nga may ‘green thumb’, kundi ang pagtanum kag pagsagod sang bulak ang nagakinahanglan sang kapisan.
Magluwas sa kita sang flower farm, ginpahayag sang natungdan nga ang pagtanum sang bulak ang nagserbe na nga bonding time nila nga magpamilya.
