Patay ang isa ka pastor matapos nga ginluthang sa Brgy. Anilao, Pavia, Iloilo.
Ang biktima amo si Douglas Jover, 63-anyos, isa ka pastor kag veterinarian, residente sang Brgy. Quintin Salas, Jaro, Iloilo City.
Sa interview sang Bombo Radyo kay Police Lieutenant Gabriel Gilmer Manguera, Deputy Chief of Police sang Pavia Municipal Police Station, iya ginpahayag nga duha ka basiyo sang bala ang nakit-an sa sulod sang salakyan sang pastor.
Suno kay Manguera, ang igo sang bala ang naghalin sa ulo kag naglapos sa sag-ang sang biktima.
Ginpahayag man sini nga isa ka suspek ang nagpanaog sa salakyan antes nagsakay sa isa ka motorsiklo.
Ginbuyagyag man sang natungdan nga may nagabantay na nga daan nga isa pa gid ka lalaki agud nga i-angkas ang suspek.
Posible naman nga nakaupod pa sang biktima ang suspek sa sulod sang salakyan antes natabo ang insidente.
Ginalantaw man nga kakilala sang biktima ang suspek bangud masami nga wala ini nagapasakay sang indi sini kakilala.
Sa subong, ginasekyar na ang mga CCTV kag nagapatuman sang follow up operation sa mga kaiping nga barangay ang mga kapulisan.
