Napaidalom na sa kustodiya sang Philippine National Police (PNP) sa Camp Crame, Quezon City ang pugante nga pastor, leader kag founder sang Kingdom of Jesus Christ (KOJC), kag self-proclaimed Appointed Son of God nga si Apollo Quiboloy.
9:30 kagab-i sang nakaabot si Quiboloy sa Camp Crame kag ginpaidalom na sa booking process amo man ang iban sini nga kaupod nga lunsay man akusado nga sanday Jackielyn Roy, Ingrid Canada, Crisente Canada, kag Syliva Cemañes.
Suno kay PNP spokesperson Police Colonel Jean Fajardo, 1:30 kahapon sang hapon sang nagsugod ang mga pulis sa negosasyon agud nga makasungka si Quiboloy.
Naghatag man ang pulis sang ultimatum nga 24 ka oras bangud kun indi pa gid ini mag-surrender, sudlon na nila ang isa ka particular nga building sa KOJC kun sa diin ginadumilian sila nga sudlon.
Kasunod sini suno kay Fajardo, nagsungka na si Quiboloy 5:30 kahapon man sang hapon. 6:30 sang ginbyahe siya paguwa sa Davao City kag nag-abot sa Villamor Airbase sang 8:30 sang gab-i antes gindala sa Camp Crame.
“Nagbigay po ang PNP po ng ultimatum po na sumuko po sila, otherwise po ay papasukin po natin ‘yung isang particular building na hindi po tayo pinapayagang pumasok so nagkaroon ng negotiation,” suno kay Fajardo.
Wala sini gindetalye kun sa diin partikular nga lugar sa KOJC nadakpan ang pastor.
Pahayag sini, present ang tanan nga abogado sang mga akusado sang gindala sila sa Camp Crame kag ginbasahan sang ila mga kaso.
“Na-inspect na rin po sila at nasa maayos naman po silang kondisyon, although some of them, based po doon sa medical examination, ay mataas po ‘yung BP [blood pressure]. Pero other than that, okay naman po sila at tuluy-tuloy po ‘yung processing,” dugang sini.
Si Quiboloy ang partikular nga nagapangatubang sang kaso nga child abuse, sexual abuse, kag qualified trafficking.
Wala pa sang maathag nga detalye sa custodial arrangements apang posible suno kay Fajardo nga i-detain sila sa separado nga units.#
