SAN JOAQUIN, ILOILO – Indi na madayon ang Pasungay nga kabahin sang tradisyon kag kultura sang banwa sang San joaquin, Iloilo.
Mismo si Mayor Ninfa Garin ang nagkumpirma nga indi na madayon ang nasambit nga kahiwatan nga isa sa mga highlights sang Pasungay Festival.
Sa iya official statement, wala napunggan ni Garin nga magpabutyag sang pagkadismaya bangud nga sa sulod sang masobra sa isa ka siglo, ginapatigayon sa nasambit nga banwa ang Pasungay sang turo nga karbaw.
Ginpanindugan naman ni Garin nga indi makabig nga animal cruelty kag paglapas sa Animal Welfare Act ang Pasungay bangud nga kinaandan na ini nga buluhaton sa ila banwa.
Sa pagpaathag ni Garin, ang nasambit nga aktibidad ang kabahin sang pagdumdom kun daw ano ka importante ang mga sapat nga nagabulig sa pagpauswag sang agrikultura.
Sa pihak sini, ginpahayag sang alkalde nga wala nagkulang ang Locval Government Unit sa pagpakigbato kag nagpanindugan nga madayon ang Pasungay apang bangud sa pagkwestyon sang mga Animal Rights Advocate, ipaiway anay ang pagpatigayon sang aktibidad.
Nagalaum naman ang natungdan nga mapadayon sa masunod nga tuig ang nasambit nga aktibidad nga nagapakita sang tradisyon kag kultura sang mga San Joaquinhon.
