LAMBUNAO ILOILO-Ginakahangaw-an sang isa ka pamilya sa banwa sang Lambunao, Iloilo ang ila seguridad matapos nakabatun sang pamahog sa social media nga sila ang carrier sang Coronavirus Disease 2019 (COVID-19) sa ila banwa.
Sa interview sang Bombo Radyo sa tagreklamo nga si Mary Grace Lastrado, iya ginpahayag nga nagpadulong sila sa Dr. Ricardo Y. Ladrido Memorial District Hospital agud kun tani ipa check-up ang iya lola nga si Cresenia Lastrado nga naaksidente sa Binalbagan, Negros Occidental.
Suno kay Lastrado, ginbalibaran kag wala ginpasulod sa nasambit nga hospital sang doctor on duty ang iya Lola bangud sa ginapahayag sintomas sang COVID-19 kag kinahanglan nga magpaidalom sa quarantine.
Ginpahayag ni Lastrado nga wala gin-asikaso sang maayo ang iya Lola kag wala ginkuhaan sang vital signs.
Gin-athag man sang natungdan nga ang iya pagpost sa social media ang may katuyu-an nga mabuligan sila kasunod sa natabo sa iya Lola.
Samtang, sa interview sang Bombo Radyo kay Dra. Cynthia Cabangal Ng, pinuno sang Hospital Management Office, iya ginpahayag nga gin-istorya niya ang pasyente matapos nakita ang reklamo sang pamilya.
Suno kay Ng, natukiban sa check-up nga may yara sang Urinary Tract Infection ang pasyente.
Sa pihak sini, indi makahatag sang pahayag ang natungdan bangud ginahulat pa niya ang formal complaint sang pamilya agud nga makahatag sang sabat ang ginareklamo nga doktor.
