ILOILO – Nagapatigayon sang weeklong information dissemination sa Iloilo ang Commission on Filipino Overseas agud nga matapna ang illegal recruitment kag human trafficking.
Sa interview sang Bombo Radyo kay Graciel Antonette Paguinto, Immigrant Service Officer 2 sang Commission on Filipino Overseas, iya ginpahayag nga ang nasambit nga ahensya ang yara sa idalom sang Office of the President kag natukod sang 1980 paagi sa Batas Pambansa 79.
Suno kay Paguinto, ang trabaho sang Commission on Filipino Overseas ang lain kun ipaanggid sa Philippine Overseas Employment Administration kag sa Overseas Workers Welfare Administration.
Ginpahayag ni Paguinto nga sakop sang ila trabaho sa Commission on Filipino Overseas amo ang paghatag sang igtalupangod sa mga problema sang kag paghatag sang proteksyon sa mga Filipino nga naka-angkon sang permanent residency sa luwas sang pungsod.
Halimbawa diri suno sa natungdan amo ang mga gina-request sang ila himata sa luwas sang pungsod ukon ang mga naka-angkon sang foreigner nga partner.
Ang tanan nga nahatagan sang permanent visa suno kay Paguinto ang naka-rehistro agud nga madali nga mahatagan sang bulig sang gobyerno sa tion sang emerhensya.
Samtang, suno naman kay Mia Bisa, Immigrant Service Officer 2 sang nasambit man nga ahensya, ang human trafficking ang lapnagon ilabi na sa mga nagapadulong sa luwas sang pungsod.
Suno kay Bisa, kinahanglan sang ahensya ang bulig sang pumuluyo agud nga matapna ang human trafficking paagi sa pagpalab-ot sang impormasyon sa 1343 actionline sang ahensya.
Ginpahayag ni Bisa nga lakip man sa lihok nga ginapatigayon sang ahensya amo ang pagpatigayon sang Pre-Departure Orientation Seminar sa mga naga-edad sang 20 anyos tubtub 59 anyos, may yara naman sang peer counselling para sa 13 anyos tubtub 19 anyos samtang guidance and counselling naman para sa mga may yara sang partner sa luwas sang pungsod.
Importante suno sa natungdan ang mga nasambit nga lihok bangud nga ang mga nagapadulong sa luwas sang pungsod amo ang mga naga-apply sang permanent residency visa.
