ILOILO CITY – Ginkumpirma sang Department of Agriculture (DA) nga may yara sang global shortage sang patatas nga ginagamit sa paghimo sang french fries.
Suno kay Agriculture undersecretary Kristine Evangelista, tuman nga naapektuhan ang mga fast food chains kag mangin ang Pilipinas ang naga-import man sang chipping potatoes.
Diri sa pungsod, table potatoes gid lamang ang ginatanum sang aton local farmers.
Bangud sini, ginpagamayan sang mga fast food chains ang serving sang fries kag wala na nagabaligya sang large size.
Suno kay Samahang Industriya ng Agrikultura (SINAG) Chairperson Rosendo So, ang iban nga mga mangunguma ang nag-untat na sa pagtanom sang patatas nga nagresulta sa manubo nga suplay sang locally-produced potatoes kag gamay nga pagsaka sang presyo.
Dugang pa ni So, ang presyo sang abono sa international market ang nagtaas kag nagtaas man ang fuel prices nga nagapataas sang cost of production nga indi masarangan sang local farmers.
Nagalaum naman sila nga mahatagan sang bulig ang mga mangunguma.
Ang presyo sang patatas sa Benguet Trading Post ang nagalab-ot na sa P43 ang kada kilo nga nagsaka sang halos P11.
Apang sa Metro Manila, ang presyo sang patatas ang nagsaka sa P70 ang kada kilo suno sa Department of Agriculture.
