NEW YORK CITY – Wala sang pagnubo sa mga kaso sang Coronavirus Disease 2019 sa New York City.
Suno kay Bombo International Correspondent Alex Vidal direkta sa New York, nagdumdom ang tawo sa lugar nga nagnubo ang mga kaso sang mga ngagkalamatay bangud nga sang nakaligad nga semana, nagnubo ang numero nga na rekord.
Apang nagapangibot ang COVID-19 bangud sang nakaligad nga Lunes, Abril 6, na rekord sa New York City ang pinakamataas nga numero sang mga nagkalamatay umpisa nga nagtuhaw ang nasambit nga balatian sa lugar.
Pahayag ni Vidal, nagdangat sa 731 ang na rekord nga nagkalamatay sang Lunes.
Sa subong, yara na sa 138,683 ka mga kaso sang COVID-19 positive sa New York City; 5,489 ang patay kag 14,590 ang naka rekober.
May mga impormasyon man nga nagaguwa nga may mga nagkalamatay sa tagsa ka mga balay apang wala ini madala sa official tally sa diin ginabanta yara sa 200 ka mga casualties.
Dugang pa sang natungdan, ginalaoman nga sa masunod nga tatlo tubtob apat ka semana, mabaton na sang mga Americans nga nagabayag sang buwis ang ila nga stimulus package nga napirmahan na sang Kongreso kag ni US President Donald Trump.
