ILOILO CITY – Naglab-ot na sa lima ang napatay sa probinsya sang Iloilo bangud sang dengue hemorrhagic fever.
Sa interview sang Bombo Radyo kay Ma. Jennifer Joy Oñate, Health Education Promotion Officer II sang Iloilo Provincial Health Office, ang isa ka dugang nga kaso sa 10th morbidity week amo ang 16-anyos nga lalaki nagikan sa syudad sang Passi.
Suno kay Oñate, dako ang posibilidad nga wala sa gilayon nagpadulong sa ospital ang biktima rason nga napatay.
Sa subong, naglab-ot na sa 87 ang kaso sang dengue sa probinsya kun sa diin, lima dira ang ginbawian sang kabuhi.
Ginalantaw sang PHO nga ang mga nagkalamatay ang wala sa gilayon nagpadulong sa ospital bangud sa kahangawa nga magpositibo sa COVID-19.
Ang banwa sang Igbaras amo ang may yara sang pinakamadamo nga kaso sang dengue sa probinsya.
Kung madumduman, nagpagwa sang executive order si Iloilo Governnor Arthur Defensor Jr. nga nagapaidalom sa probinsya sa alert level 5 bangud sa madamo nga kaso sang dengue sa probinsya
