ILOILO CITY – Gin-igo sang air strike sang Israel ang Gaza kag nagbalos naman sang rocket fire ang Palestinian militant group sa nagapadayon nga tensyon sa tunga sang duha ka pungsod nga nag-umpisa pa sang nagligad nga tuig.
Suno sa Israel, napilitan sila nga maglunsyar sang “pre-emptive” operation batuk sa Islamic Jihad bangud ginapahayag nga ang grupo ang nagaplano na nga magpang-atake matapos ang pila ka adlaw nga tensyon sa Gaza border.
Ginpahayag sang health authorities sa Gaza nga Palestinian enclave nga kontrolado sang Islamist group nga Hamas nga nagdangat na sa 11 ang napatay sa pagpang-atake sang Israel lakip na ang lima ka tuig nga bata nga babayi kag masobra sa 80 ang napilasan.
Ginbanta sang Israeli army nga 15 ka mga militante ang napatay sa operasyon.
Kahapon, mas ginpasangkad pa sang Israel ang ila nga operasyon batuk sa Islamic Jihad, isa ka grupo nga naka-align sa Hamas apang masami nga nagahulag nga independent.
Ang Israeli army ang nag-anunsiyo nga may yara sang naaresto nga 19 ka mga tawo nga ginapahayag nga myembro sang grupo sa nasakop nga West Bank kag ang pag-aresto sang isa pagid ka tawo.
Ginkumpirma man sang Israel kag Islamic Jihad nga napatay na si Taysir al-Jabari, key leader sang mga militante pinaagi sa isa ka strike sa building sa nakatundan sang Gaza City.
Suno sa Islamic Jihad, ang inisyal nga pagpamomba sang mga Israeli ang nagakaangay sa pagdeklarar na sang inaway antes pa man ini nag-release sang rockets pakadto sa Israel.
Ang rocket fire kag Israeli strikes ang nagpadayon kahapon kag ginakabalak-an nga magsulit sang 11 ka adlaw nga conflict sang May 2021 nga nagguba sang Gaza kag nagpwersa sa tuman ka damo nga Israelis nga magpadulong sa mga bomb shelters.
