Naglab-ot na sa 48 ang inisyal nga report sang mga nagkalamatay sa syudad kag probinsya sang Cebu kasunod sang paglaslas sang Bagyo Tino.
39 sa sini ang halin sa probinsya samtang siyam naman ang halin sa Cebu City sandig kay Capitol Information Officer Ainjeliz de la Torre-Orong.
Ang na-report nga fatalities sa probinsya ang nagikan sa Mandaue City, Compostela, Danao City, kag Talisay City.
Magluwas sa ila, may 28 pa nga mga missing.
Indi pa matumod kun pila ang nagkalaguba nga mga balay kasunod sang mabaskog nga bubo sang ulan kag makusog nga hangin kahapon antes nagkadto ang bagyo sa Panay area.
Kagab-i, ginpirmahan naman ni Cebu Governor Pamela Baricuatro ang Executive Order No. 68 nga nagapaidalom sa probinsya sa state of calamity.
Madamo pa nga areas subong ang wala gihapon sang suplay sang kuryente kag may limitado lamang nga mobile signal kasunod sang bagyo. Na-eksperyensyahan ang communication blackouts sa Compostela, Liloan, Consolacion, kag pila ka parte sang Mandaue rason nga mabudlay para sa mga residente nga makig-angot sa ila nga mga himata kag mabudlay man ang relief efforts.
Natabo ang paglaslas sang bagyo samtang naga-amat-amat pa lang recover ang mga taga-Cebu sa nangin epekto sang magnitude 6.9 nga linog sang Septyembre 30 nga nagadala pa gihapon sang sunod-sunod nga mga aftershocks.#
(Photo: Romeo Marantal)
