Nagdangat na sa 3,400 ang numero sang nagkalamatay sa Myanmar bangud sa 7.7 magnitude nga linog nga nagtay-og sa pungsod kag sa kaiping nga mga nasyon sang Byernes.
Suno sa junta kag sa state media, magluwas sa 3,471 nga napatay, may 4,508 nga nasamaran kag may 220 nga nagapabilin nga missing.
Ginsulit man sang United Nations aid chief ang panawagan sini sa iban nga mga nasyon nga magbulig bangud linibo sa mga residente ang nagatulog na lang sa guwa bangud sa kahadlok sa pag-collapse sang mga building samtang ang iban naman ang wala na gid sang balikan nga puluy-an.
Lakip sa nanguna sa paghatag sang suporta kag rescue teams amo ang India, China, kag Russia.
Ang Estados Unidos amo gid ang tradisyonal nga sa unahan sang international disaster relief, apang sini nga tuig, matandaan nga gin-dismantle na ni President Donald Trump ang ila nga humanitarian aid agency. Sa pihak sini, nagpromisa man ang Washington nga magadugang ini sang $7 million magluwas sa $2 million nga assistance nga una na nila nahatag sa Myanmar.
Sa bahin sang Pilipinas, ginpahayag sang Office of Civil Defense (OCD) nga handa ini nga magpadala sang isa pa ka humanitarian contingent kun makabalik na ang una nga ginpadala nga team.
Sa Abril 12 magabalik sa Pilipinas ang una ng team suno sa OCD matapos nga nag-abot sila sa Myanmar sang Abril 1-2.
Nahibaluan nga lakip pa sa ginapangita subong amo ang apat ka Filipino teachers nga naga-istar sa Sky Villa nga amo ang isa sa nag-collapse nga mga building sang natabo ang linog.
