Naglab-ot na sa indi magnubo sa 15 ka tawo ang patay matapos ang duha ka separado nga landslides nga nagluntad sa Sarangani kag Lanao del Sur.
Sa Malapatan, Sarangani, nagdangat sa 10 ang patay matapos matabunan sang duta ang mga balay sa Barangay Poblacion, suno sa Municipal Disaster Risk Reduction and Management Office.
Base sa report, ang mga napatay nagikan sa duha ka pamilya, lakip na ang pila ka kabataan.
Suno kay Malapatan Mayor Salway Sumbo Jr., ginpatigayon ang rescue operation matapos magreport ang mga opisyal sang nasambit nga lugar nahanungod sa insidente.
Ginpang-usisa man sang mga awtoridad ang posible nga ginhalinan sang landslide, lakip na ang epekto sang magnitude 7.8 nga linog nga nag-igo man sang Hunyo 8, 2026 nga posible nagpahumok sa duta sa nasambit nga lugar.
Bangud sa insidente, ginaplano sang provincial government nga isaylo ang mga pamilya nga nagaestar malayo sa lugar kun sa diin nagluntad ang landslide.
Ginabanta nga naglab-ot na sa 115 ka pamilya halin sa duha ka barangay sa Malapatan ang naapektuhan sang mabaskog nga pag-ulan nga dala sang Bagyong Inday.
Samtang, sa Barangay Ngingir sa Calanogas, Lanao del Sur, lima naman ka tawo ang napatay samtang anum pa ang ginapangita.
Suno sa Lanao del Sur Police Provincial Office (LDSPPO), duha ka tawo ang nasamaran sa insidente bangod sang padayon kag mabaskog nga pag-ulan sa lugar.
Nagapadayon naman ang search and rescue operations para sa anum pa ka tawo nga ginapahayag natabunan upod sa ila mga balay.
