ILOILO CITY – Nagsaka pa sa walo ang napatay sa natabo nga vehicular accident sa Purok 11, Barangay Maputi, Naawan, Misamis Oriental kun sa diin, pito diri ang aktibo nga katapo sang Philippine National Police.
Ang isa nga napatay ang isa ka retired police nga amo ang nagapanag-iya sang van.
Magluwas sa mga napatay, 23 pa ang pilason nga ginalakipan sang 20 ka mga pulis.
Nahibaluan nga pauli na kuntani ang mga pulis nga assigned sa Police Regional Office 10 nga nagapaidalom sa Public Safety Junior Leadership Course sa Regional Training Center 10 sa Iligan City.
Ini sila ang may ‘privilege pass’ nagikan sa training center agud nga mapauli sa ila tagsa ka lugar sa Lanao del Norte kag Misamis Occidental.
Sang yara na sa lugar, nag-overtake ang wing van nga may karga nga pulis apang hinali lamang nga naglupok ang panguna nga royda sang truck nga nagresulta sa pagbunggu-anay sang tatlo ka mga salakyan.
Nagpasalig naman sang bulig ang Police Regional Office 10 para sa kinahanglanon sang mga biktima kag sang nabilin nga mahal sa kabuhi sang mga napatay.
