Nagsaka na sa 254 ang naisip nga nagkalamatay sa Vietnam bangud sa Bagyo Yagi ukon kilala anay nga si Bagyo Enteng nga naglaslas man sa Pilipinas sang nagligad nga semana.
Suno sa Vietnamese disaster management agency, 820 ka mga tawo ang nasamaran kag 82 pa ang missing.
Matandaan nga Sabado, Septyembre 7, sang nag-landfall ang bagyo sa northeastern coast sang Vietnam matapos nag-agi sa China nga nagbilin man sang duha ka patay.
Sa isa ka lugar sa Lao Cai, hilway nga nakabalik sa ila puluy-an ang 115 ka mga tawo nga nalista anay nga missing. Nadiskubrehan nga nagpanago sila sa bukid, naghimo sang tents nga human sa kawayan kag tarpaulins, bangud sa kahadlok nga matiphagan sang duta ang ila puluy-an bangud sa mabaskog nga bagyo.
Suno sa UN children’s agency nga UNICEF, kinahanglanon ang $15 million para magamit sa critical needs sang apektado nga mga kabataan kag ila nga pamilya.
Sa kapital nga Hanoi, amat-amat na nga nag-subside ang tubig halin sa nag-awas nga Red River kag ginpahanugutan na liwat nga maglabay sa taytay ang trapiko.
Matandaan nga diri sa Pilipinas, ini nga bagyo ang nagbilin sang masobra 20 ka mga patay.#
