JAPAN – Nagsaka na sa apat ang patay samtang masobra sa 90 naman ang napilasan sa paglaslas sang bagyo Hagibis sa Japan.
Suno sa otoridad, ang mga patay ang gikan sa Chiba, Gunma, Kanagawa kag Fukushima prefectures malapit sa Tokyo.
Ang una nga casualty ang ginapahayag nga naghalin sa Chiba sa nasidlangan nga bahin sang Tokyo bangud sa mamadlos nga hangin sa diin nagtabog ang kotse nga gintunaan sang kamatayon sang driver.
Ang iban sa mga napatay ang ginapahayag naman nga tuga sang landslide sa diin ang isa sa mga biktima ang naga-edad sang 60 anyos pataas samtang may yara naman sang mga missing.
Sa interview sang Bombo Radyo kay Bombo International Correspondent Josel Palma direkta sa Japan, iya ginpahayag nga sa Tokyo, indi na mabatyagan ang mamadlos nga hangin apang padayon sa gihapon ang pagbubo sang mabaskog nga ulan.
Suno kay Palma, wala pa sa gihapon ginapahanugutan ang evacuees nga makabalik sa ila tagsa ka balay kag wala man ginapanugyan ang pagguwa sa balay bangud sa pagbaha sa pila ka bahin sang Japan.
Ginpahayag ni Palma nga sa subong, kanselado sa gihapon ang tanan nga transport services kag sirado man ang mga amusement park kag mga commercial establishment.
Magluwas sa bagyo, gintay-og man ang Japan sang linog kag may buhawi man nga naglaslas sa Chiba prefecture sa diin may mga edipisyo nga nagkalaguba.
Ginabanta nga masobra sa 370,000 ka pamalay ang nadulaan snag supply sANg kuryente samtang 17,000 naman ka rescuers ang naka stand-by.
Wala naman nadayon ang duha ka rugby event kahapon nga adlaw kadungan sang pag land-fall sang bagyo Hagibis rason nga gindeklarar na lang nga draw ang hampang.
Nahibalu-an nga kahapon, nag land-fall ang bagyo Hagibis sa Honshu Island kag ginakabig nga pinakamabaskog nga bagyo nga naglaslas sa Japan humalin sang 1958.
Ang bagyo Hagibis ang nagdala sang record-breaking rainfall nga 939.5mm nga ulan sa sulod sang 24 oras.
Bangud sini, ginpaidalom sa level 5 ang disaster level sa Japan.
