Nagsaka na sa 45 ang numero sang mga napatay kag 53 ang napilasan sang nagcrash ang C-130 aircraft sang Philippine Air Force (PAF) sa Patikul, Sulu.
Santo sa pinakaulihi nga anunsyo sang militar, ang mga nagkalamatay ang ginalakipan sang 42 ka military personnel nga sakay sa amo nga eroplano kag tatlo ka sibilyan nga yara sa ground sa banwa sang Patikul.
96 ka personnel ang kabug-usan nga sakay sang eroplano, kag sa 49 ka katapo sang militar nga napilasan, lima ang missing.
Sa mga tawo nga yara sa ground, tatlo ang patay kag apat ang pilason.
Ang amo nga C130 military aircraft nga may tail number 5125 ang naghalin sa Lumbia Airport sa Cagayan de Oro City kag mahugpa kuntani sa Jolo port sa Sulu sang nagcrash ini 11:30 kahapon sang aga.
Suno sa statement sang Joint Task Force Sulu, nagcrash ini sa Sitio Amman sa Barangay Bangkal sa Patikul.
Suno kay AFP chief General Cirilito Sobejana, posible nga naglapaw ukon nag overshoot ang eroplano sa runway.
May mga nakasaksi sa insidente nga nagpahayag nga naglumpat ang pila ka pasahero antes pa man diretso nga magtupa sa duta ang lawas sang eroplano.
Kadam-an sa mga pasahero ang bag-o lang nagraduate sa basic military training kag ginpangdeploy sa isla bilang kabahin sang anti-terrorism campaign sa Muslim-majority nga rehiyon.
Suno pa kay Bangsamoro government spokesperson and rapid disaster response head Minister Naguib Sinarimbo, ang amo nga eroplano ang nakadeliver pa sang COVID-19 medicines kag equipment sa island provinces sa rehiyon.
Amo man ini nga eroplano ang ginsakyan ni Presidential Spokesperson Atty. Harry Roque sang nagpadulong ini sa Iloilo City sang nagligad nga semana agud nga magdala sang bakuna kag medical equipment.
Nahibaluan nga ini na ang ikatatlo nga plane crash subong nga tuig nga involved ang aircraft sang Armed Forces of the Philippines (AFP).
Sang Enero kag Hunyo natabo ang una nga duha ka makamamatay nga pagtibusok.
May mga espekulasyon nga may mga depekto na ang mga equipment nga ginabakal kag ginagamit sang AFP — butang nga ginpanginwala naman ni Department of National Defense Secretary Delfin Lorenzana.
Suno kay Lorenzana, gina-imbestigaran pa ang rason sang insidente kag samtang wala pa sang resulta ang pagpangusisa, ang anuman nga sahi sang espekulasyon ang ginakabig wala sang basehan kag wala sang respeto sa Philippine Air Force, AFP, kag sa pamilya sang mga napatay.
Nagpalab-ot man sang mensahe sang simpatiya ang palasyo sang Malacanang kag si Vice President Leni Robredo sa pamilya sang mga biktima.
Nagpasalig man ang Philippine National Police nga magabulig ini sa search and rescue operation para sa possible survivors sa amo nga trahedya.
