Gin-disarmahan sang issued firearm kag gin-hold sa admin sang Regional Mobile Force Battalion (RMFB) 6 ang Patrolman nga gina-alegar nagtuyo nga maghimulos sa isa ka room attendant sang Pension House sa distrito sang City Proper sang Hunyo 10.
Madumduman nga ang suspetsado ang ginkilala kay alyas Lee, 29-anyos, residente sang Lanao del Norte nga may ranggo nga Patrolman kag naka-assign sa 602nd Company sang Regional Mobile Force Battalion (RMFB) sa banwa sang Calinog.
Sa matandaad nga nakagwa ang suspetsado nga pulis sa presohan sang Hunyo 11 matapos nga nakapyansa ini.
Suno kay ICPO Director PCol Wilbert Parilla, wala na ginpa-duty ang nasambit nga pulis samtang nagapadayon ang iya nga kaso nga kriminal kag administratibo.
Pahayag pa niya nga ang Regional Investigation Detective Management Division na ang makahatag sang rekomendasyon kun i-dismiss sa serbisyo ang pulis depende sa resulta sang imbestigasyon bangud nga magaagi pa sa legal nga proseso ang kaso sini.
Ginpahayag man ni PCol Parilla nga base sa background checking nila sa suspetsado, amo ini ang una nga bes nga magapangatubang ang pulis sa kaso nga kriminal kag administratibo.
Dugang pa niya, base man sa panaysayon sang biktima, ginpangiwala sini ang alegasyon nga may yara sila sang na-una nga chatanay sang suspetsado kag nanindugan ini nga sang adlaw nga nag-check in ang pulis sa ginatrabahonan niya ang una nga bes man nga naka-esturya niya ini.
Wala pa tubtob subong nabatian ang bahin sang pulis angut sa nasambit nga alegasyon.
Madumduman man na-file naman ang kaso nga Attempted Rape batuk sa pulis.
