Ginsigurado sang Armed Forces of the Philippines (AFP) nga padayunon sini ang maritime patrols apisar sang natabo nga insidente sang nagligad nga Huwebs kun sa diin involved ang duha ka military aircrafts sang China sa Bajo de Masinloc (kilala man nga Panatag ukon Scarborough Shoal).
Suno kay Col. Francel Margareth Padilla, spokesperson sang militar, nagsunod ang Pilipinas sa standard operating procedures kag ginpanindugan nga isa ka legal nga maritime patrol ang ginahimo sa sulod mismo sang Philippine exclusive economic zone.
Ginasunod man suno sa iya ang international law lakip ang prinsipsyo sa freedom of navigation and flight.
Ginpahayag sini nga ang amo nga insidente ang indi makapugong sa pwersa-militar sang Pilipinas nga magpatigayon sang nakaandan na nga pagpatrolya bilang kabahin sang pagproteher sa territorial integrity kag pag-insister sang sovereign rights sa West Philippine Sea.
Una na nga ginpahayag sang militar nga natabo ang insidente sang Huwebes sang aga kun sa diin nangin delikado ang pag-maneuver sang duha ka aircraft sang People’s Liberation Army Air Force nga yara mismo sa alagyan sang NC-212i Philippine Air Force propeller aircraft.
Pahayag pa ni AFP chief General Romeo Brawner Jr., bangud sa ginhimo sang China, nabutang sa alang-alang ang safety sang personnel sang Pilipinas nga nagahimo sang maritime security operations sa Philippine maritime zones.
Ginsiling man sini nga naghilabot ang Chinese aircraft sa isa ka legal nga flight operations kag isa ini ka maathag nga paglapas sa international law sa aviation safety.
Kasunod sang hitabo, nagbalik ang piloto kag ang crew sa Clark Air Base sa Pampanga ‘las dies sang aga sang amo nga adlaw.
Apisar safe ang mga personnel, ginkondena sang militar ang lihok sang China sang nagpasa naman sang report sa Department of Foreign Affairs.
Ini ang labing-una nga tion sa idalom sang Marcos administration nga nag-reklamo ang Pilipinas batok sa delikado nga mga aktwasyon sang Chinese aircraft bangud sa nakaandan, ang ila navy ukon coast guard vessels ang nagapang-bangga sa tropa sang Pilipinas.
