Ginhingadlan ang 42-anyos nga Spanish legend nga si Pau Gasol bilang dugang nga global ambassador para sa FIBA World Cup 2023 kun sa diin ang mga host amo ang Pilipinas, Japan, kag Indonesia.
Gin-updan sang nasambit nga international basketball icon si Luis Scola sang Argentina nga una na na-anunsyo bilang isa man ka World Cup global ambassador.
Katapusan nga naghampang si Gasol para sa Barcelona sang 2021 kag madumduman nga nagdaog man sa 2006 FIBA World Cup sa Japan.
Sa kabug-usan, nakahampang si Gasol sa tatlo ka World Cups, lima ka Olympics, kag pito ka FIBA EuroBaskets.
Ginbuligan sini nga itib-ong ang Espanya agud makadaog sang silver medals sa 2008 kag 2012 Olympics kag bronze medal naman sa 2016 Rio de Janeiro Games.
Isa man siya ka two-time National Basketball Association champion sang yara pa sa Los Angeles Lakers.
Nagpabilin siya nga aktibo sa sports pagkatapos sang iya nga retirement sa international basketball pagkatapos sang Tokyo Olympics in 2021.
Bilang World Cup Global Ambassador, dal-on ni Gasol ang iya ihibalo kag passion sa basketball agud nga ma-promote kag masuportahan ang tournament.
Patigayunon ang FIBA World Cup halin sa Agusto 25 tubtub sa Septyembre 10.##
