ILOILO CITY – Ginpakigbahin ni Philippine bet Pauline Amelinckx ang iya pagpalangga sa dagat sa iya bag-o nga video para sa Miss Supranational 2023 pageant.
Nagsugod na ang pagpagwa sang organization sang “From the Ground Up” video series kun sa diin, ang mga kandidata ang nagpakigbahin sang ila tagsa ka advocacies kag community service initiatives nga ila ginasundan.
Sa iya nga video entry, ginbalikan ni Pauline ang iya pagpalangga sa dagat nga nagsugod sang siya ang bata pa lamang kag bilang isa ka certified free diver, nagdalum pa ang iya appreciation sa gintawag niya nga beautiful wonder.
Suno sa iya, gin-combine niya ang iya passion para sa marine conservation kag ang iya kalingawan agud nga makahimo sang bagay nga mas mapinuslanon nga amo ang marine animal-themed coloring book para sa mga kabataan.
Nagalaum si Pauline nga sa bulig sang platform sang Miss Supranational, makakuha siya sang mas malapad nga audience nga mangin interesado sa pagbulig sa kumunidad.
Si Pauline ang ginkoronahan bilang Miss Supranational Philippines 2023 sang Mayo kasunod sang Miss Universe Philippines 2023 coronation night.
Yara siya subong sa Poland para sa Miss Supranational pageant kun sa diin, maga-compete siya sa paglaum nga makuha ang ikaduha nga korona para sa Pilipinas.
Ang Miss Supranational 2023 coronation night ang hiwaton sa Hulyo 14.
