PAVIA, ILOILO – Nagpaathag si Pavia, Iloilo Mayor Laurence Anthony “Luigi” Gorriceta matapos gin akusaran ni Pavia, Iloilo Councilor Jose Maria ‘Pyt’ Trimañez nga nagpamalabag agud nga sugaton sang ambulansya nga ginapanag-iyahan sang ila banwa agud kun tani magpa-quarantine.
Si Trimañez ang naka close contact sa empleyado sang AC Energy nga nagpositibo sa Coronavirus disease 2019 (COVID-19) matapos nag istorya ang mga ini sa ginapanag iyahan nga restaurant sang konsehal.
Sa exclusive interview sang Bombo Radyo kay Gorriceta, iya ginpahayag nga naka istorya na sila ni Pavia Municipal Health Officer Dr. Joyous Jan Santos sa diin nadesisyunan nila nga sa distrito na lang sang La Paz, mapa-quarantine si Trimañez bangud didto man siya naka close contact sa mga COVID-19 positive.
Ginpahayag sang alkalde nga sang tion nga mapasugat ang konsehal, madamo sang mas importante nga sulugaton ang ambulansya sa diin makit-an man ini sa ila logbook.
Nagalibog naman ang ulo sang konsehal kun ngaa nagadali si Trimañez nga sugaton sang ambulansya apisar nga wala pa man ang mga ini naka paidalom sa reverse transcription polymerase chain reaction (RT-PCR) test.
Kun may isyu man sa tunga nila ni Trimañez, ginpahayag ni Gorriceta nga mas maayo nga istoryahan nila sa opisina sang alkalde.
Matandaan nga Hulyo 29 sang naka-istorya ni Trimañez ang mga COVID-19 positive nga empleyado sang AC Energy apang Agusto 7 na siya nakahibalo nga may virus ang nasambit nga persona.
Agusto 8 sang nagpaidalom si Trimañez sa RT-PCR test upod sang iya tiayon kun sa diin nag-negatibo man ang ila resulta.
