ILOILO CITY – Mas ginpasangkad pa sang Pavia Municipal Police Station ang police visibility sa nasambit nga banwa.
Ini ang kasunod sang duha ka hugnat nga rambol sa idalom sang Aganan flyover.
Sa interview sang Bombo Radyo kay Police Staff Sergeant Franklin Suizo, imbestigador sa Pavia Municipal Police Station, iya ginpahayag nga ang una nga duha ka biktima ang nagalakat sa dalan sang hinali nga ginkastigo sang lima ka mga wala na ginhingadlan nga suspek.
Suno kay Suizo, nasal-an sang mga suspect ang isa sa mga biktima nga amo ang nagsalapay sa isa nila ka upod.
Gilayon naman nga nagpalagyo ang mga biktima kag ginpanginwala ang pahayag sang mga suspek.
Pagkatapos sang pila ka ginutlo suno kay Suizo, may naglabay naman nga duha ka lalaki kag nasal-an sang mga suspek nga kaupod pa sang una nga duha ka biktima nga ila na ginsapote.
Didto kag ginsapote man nila ang duha ka mga biktima.
Bangud sini, nag-agum sang mga pilas sa ulo, nawong, kag likod ang apat tanan ka mga biktima.
Ang duha naman sa mga suspek ang kilala sang isa sa mga biktima bangud nga isa lamang sila ka lugar.
Apang pahayag ni Suizo, nakulbaan ini nga magkooperar sa otoridad bangud sa kahadlok nga magbalik sa presuhan bangud on probation ini sa kaso nga frustrated murder.
Gin-refer na sang kapulisan ang kaso sa barangay.
