Gin-athag sang Pavia Municipal Police Station (MPS) nga indi makaapekto sa kaso nga murder sang duha ka mag-utod nga nagtiro-patay sa stay-in driver ni Land Transportation Office (LTO) VI director Atty. Gaudioso P. Geduspan II sa Brgy. Ungka 2, Pavia, ang kapaslawan nga makita ang armas nga gingamit sa krimen.
Ang biktima amo si Wilmer Casquite Villaros, legal ang edad, kasado, residente sang Janiuay, Iloilo, apang temporaryo nga nagatinir sa amo nga subdivision.
Samtang ang mga suspek, amo sanday Jay-R, 40, kag Boy, 45, kag nagaalegar nga taga-Barangay Aldeguer, Sara apang may I.D. nga nagapakita nga taga-Pampanga.
Sa interview sang Bombo Radyo kay Police Major Dadje Delima, Chief of Police sang Pavia Municipal Police Station, iya ginpahayag nga Byernes sang nahikutar ang mga dokumento nga kinahanglanon agud nga mapasaka ang kaso batok sa mga suspek.
Suno kay Delima, ginhimo ang tanan nga ‘means’ agud ma-recover ang armas sang mag-utod kon sa diin, nag-apply ang talatapan sang search warrant kag gilayon man nga gin-aprubahan sang Korte.
Gin-implementar ang search warrant kagab-i kon sa diin, ginlakipan sang pila ka otoridad kag witnesses.
Gintuad man sini nga nangin matalunsay ang ginpatuman nga tikang, apang wala na-recover ang armas-luthang.
Gin-athag liwat sang talatapan nga ginpatuman ang search warrant bangud wala sang recoveries sa mga suspek sang sila ang nadakpan sa Sara, Iloilo.
Wala naman ginadula sang Pavia PNP ang posibilidad nga mahimo ginbilin sang mag-utod ang pusil samtang sila ang nagapalagyo padulong sa Sara, Iloilo.
