Ginkumpirma sang Pavia Municipal Police Station (MPS) nga ang nadakpan nga subject sa buy bust operation sa Brgy. Mali-ao, Pavia, Iloilo ang anak sang anay alkalde sang Carles, Iloilo.
Ini amo si Alyas RJ, 44-anyos, residente, sang Brgy. Ungka, Jaro, Iloilo City.
Sa interview sang Bombo Radyo kay Police Lieutenant Gabriel Manguera, Deputy Chief of Police sang Pavia Municipal Police Station, iya ginpahayag nga nakuha sa posisyon sang subject 9 sachets sang suspected shabu nga may kabug-aton nga 150 grams.
Naglab-ot man sa P1,020,000.00 ang balor sang iligal nga druga.
Suno kay Manguera, nabaklan sang isa ka sachet sang iligal nga druga ang subject nga may balor P15,000.00.
Ginakabig man sang Pavia MPS nga HVI ukon High Value Individual si alyas RJ.
Preso kag nagapangatubang na ang subject sang kaso nga paglapas sa Republic Act 9165 ukon Comprehensive Dangerous Drugs Act of 2002.
