May ginasundan na nga duha ka persons of interest ang Pavia Municipal Police Station kaangot sa nagluntad nga pagpang-holdup sa fuel tanker sang Metro Iloilo Transport Service Cooperative (MITSCOOP) sa Hibao-an, Pavia, Iloilo.
Sa interview sang Bombo Radyo kay Police Major Harold Rendora, Chief of Police sang Pavia Municipal Police Station, iya ginpahayag nga pasado las-9 sang gab-i kahapon nga adlaw sang ginabaybay sang fuel tanker ang dalan halin sa Brgy. Balabag, Pavia, kag sang nakalab-ot na ini sa Gorriceta Avenue, may nagbalabag na sa iya nga isa ka Mitsubishi mirage.
Suno kay Rendora, naka-cover pa sang conduction sticker ang plater number sang salakyan sang suspek.
Gintuad man sini nga gintayaan sang pusil ang driver sang tanker truck kag ginkuha ang bag nga naga-unod sang kwarta nga indi magnubo sa P300,000.
Gilayon naman nga nagpalagyo ang Mitsubishi mirage lakip na ang isa ka motorsiklo nga ginalantaw man nga kaupod sang nang-holdup.
Nahibaluan nga magarahe na kontani ang tanker sa C1 Road sa Brgy. Pandac, Pavia kon sa diin, 150 meters na lang ang kalayuon sini antes makalab-ot sa amo nga garahe.
Natumod man nga bag-ohanon ang driver kon sa diin, duha pa lang ka semana nga naga-remit sang kwarta sang fuel tanker.
Nagapatuman naman subong back tracking ang Pavia PNP agud nga matumod ang direksyon sang mga hold upper.
