PAVIA, ILOILO – Nagpasalamat ang Philippine National Police sa ginhatag ni Iloilo City Mayor Jerry Treñas nga reward nga P50,000 sa makatudlo sa suspek nga hungod nga nagbunggo sa mag-asawa sa Pandac, Pavia, Iloilo.
Ang ginbawian sang kabuhi amo ang bana nga si Rave Garcia, 33, samtang pilason naman ang asawa sini nga si Shefryl Garcia, 23, lunsay residente sang Barangay Oñate de Leon, Mandurriao, Iloilo City.
Naghalin ang mag-asawa sa distrito sang Mandurriao kag pakadto kuntani sa Brgy. Balabag, Pavia, Iloilo sakay sa ila nga mountain bike sang natabo ang insidente.
Sa interview sang Bombo Radyo kay Police Major Dadje Delima, hepe sang Pavia Municipal Police Station, iya ginpahayag nga nagapasalamat siya sa alkalde bangud sa pagtanyag sini sang reward money.
Apang suno kay Delima, nakilala naman ang suspek nga nagapanag-iya sang BMW sportscar.
Sa subong, suno sa hepe, ginahulat na lang nila nga mangin estable ang kondisyon sang misis agud mapasaka na ang kaso batok sa suspek.
