ILOILO CITY – Diskusyunan pa liwat sa masunod nga sesyon sang Iloilo City Council ang ginaduso nga Pay Parking Ordinance sa syudad.
Sa interview sang Bombo Radyo kay Iloilo City Councilor Atty. Rommel Duron, chairman sang Committee on Transportation sa Iloilo City Council, iya ginpahayag nga wala pa ini naaprubahan kag committee hearing pa lang ang napatigayon.
Sa subong walo ka mga dalan ang ginalantaw posible nga patumanan sang sini nga pagsulundan apang bukas pa man ang komitiba sa iban pa nga suhestiyon sang iban nga mga konsehal sa Iloilo City Council.
Ini nga mga dalanon amo ang Calasanz, Aldeguer, Guanco, Solis, Zamora, Iznart, Ortiz, kag Aduana.
Istoryahan suno kay Duron kun may iga-hire nga mga tawo nga maka-manage sini nga ordinansa kag ang bayad nga kinahanglan.
Bangud nga ginapahanugutan naman ang on-road parking sa syudad, mas maayo nga sukton na lang suno kay Duron agud makadugang pa sa income sang syudad.
Pasiguraduhon suno kay Duron nga indi malapas ang road clearing operations nga mandu sang Department of the Interior and Local Government (DILG).
