Ginpa-hold ang payment sa Amethyst Horizon Builders and General Contractor, Inc., contractor sang Phase II sang Iloilo City District Jail sa Buntatala, Leganes, bangud konektado ini sa gin-ban nga listahan sang DPWH suno kay kay Rica Jane D. Gardose, Regional Public Information Officer sang DPWH 6.
Sa pagpangusisa kag pagpakig-angut sang Bombo Radyo ginpahayag ni Gardose nga maapektuhan gid ang proyekto kag magapadayon sila sa pagsunod sang mga direktiba halin sa mas mataas nga ahensya.
Matandaan nga gin-revoke ang lisensiya sang kompanya nga konektado sa pamilya Discaya, nga may kalabutan sa mga maanomalya nga flood control projects.
Ang Phase II sang pasilidad may kabug-usan nga pondo nga P154.4 milyon kag kabahin sang mas daku nga plano sang Bureau of Jail Management and Penology (BJMP)-6. Gin-groundbreaking ini sang Hunyo 6, 2024, kag ginlauman nga matapos sa Oktubre 5, 2025, apang subong, ginpahayag nga suspendedo ang kontrata sang Amethyst Horizon Builders tubtob sa dugang nga pahibalo.
Samtang padayon man ang konstruksyon sang Phase I sang pasilidad nga ginapangunahan sang J.E. Tico Construction Co., Inc., kag wala ini naapektuhan sang isyu. Ginpahayag nga yara na sa 48% ang progreso sang regional office sang BJMP nga ginatukod sa atubang sang district jail.
Ang Iloilo City District Jail Building ginlantaw nga maka-accommodate sang 2,000 ka inmates kag magahatag sang mas maayo nga pasilidad para sa mga persons deprived of liberty (PDLs), upod ang edukasyon kag livelihood programs sa bulig sang TESDA kag DOLE.
Ang proyekto ginpondohan paagi sa Republic Act No. 11975, General Appropriations Act of 2024, nga ginpangunahan ni Uswag Ilonggo Party-list Representative James ‘Jojo’ Ang Jr., nga amo man ang chief sponsor sang funding.
