ILOILO CITY – Gin-athag ni Punong Barangay Joel Alvarado nga ginagamit lamang ang pangalan sang Barangay Bakhaw, Mandurriao, Iloilo City agud nga malikaw ang iban nga barangay sa issue sang iligal nga droga.
Sa buy bust operation sa banwa sang Pavia, Iloilo subong lamang nga semana, gintu-ad sang durugista nga nagikan sa nasambit nga barangay ang ginabaligya niya nga droga.
Sa interview sang Bombo Radyo kay Alvarado, iya ginpahayag nga sang nagligad nga duha tubtob tatlo ka bulan, wala nasambit ang ila nga barangay sa mga ginpatigayon nga anti-illegal drug operation.
Sa ila nga bahin, ginpahayag ni Alvarado nga ginatinguha-an gid nila nga mapapas ang iligal nga droga sa ila lugar.
Nagapadayon man ang ila nga koordinasyon sa mga kapulisan kag ginahatag ang tanan nga impormasyon nga ila nga nahibaluan.
Ang Barangay Bakhaw ang ginakabig nga hotspot sa syudad kun iligal nga droga ang pagahambalan.
Ang ginakabig nga top drug lord sang Western Visayas nga si Richard Prevendido ang residente sang nasambit nga barangay.
Sang Enero 25 subong lang nga tuig, arestado ang 32 ka mga indibidwal sa ginpatigayon nga drug buybust operation sa Zone 2 sa nasambit nga barangay.
