Gin-athag ni Punong Barangay Karl John Lapascua sang Barangay San Pedro Molo, Iloilo City nga wala sang mga ini ginbulsa ang 14 million pesos nga disallowance ukon kantidad nga ginapabalik sa ila sang Commission on Audit ukon COA.
Sa interview sang Bombo Radyo kay Lapascua, iya ginpahayag nga may ara sang kulang nga dokumento agud mapamatud-an kun diin kag paano nagasto ang pondo.
Ginpahayag man sini nga may kaangtanan man ang ini nga problema sang tion sang COVID-19 pandemic bangud may lapses sa mga dokumento gani nalab-utan sang reglementary period ang pagpasa sang kinahanglanon nga mga papeles kag nagresulta sa disallowance.
Kahapon nga adlaw, Setyembre 4, ila na nga na-istoryahan sa ila barangay session kun ano ang ila dapat nga pagahimuon lakip na ang pag-usisa kun ngaa may mga dokumento nga kulang.
Nahibaluan nga gindangop naman ni Lapascua ini nga problema sa City Accountant kag kay DILG City Director Oscar Lim kag ginsingganan ang mga ini nga amat-amaton nga i-settle ang account paagi sa ila nga barangay honoraria.
Nagsiling man si Lim sa iya nga amat-amaton man ang pagsubmit sang financial report kag indi bilog nga honoraria ang igabayad sa disallowance.
Ginklaro man ni Lapascua nga wala sang lamod nga korapsyon ang disallowance kag handa niya atubangon ang desisyon sang COA.
Apisar nagtuhaw ang nasambit nga disallowance, ginpabutyag niya nga magapadayon siya sa pagserbisyo sang tampad sa pumuluyo sang Barangay San Pedro.
