Gin-ako sang pamunuan sang Barangay Benedicto, Jaro, Iloilo City nga wala sila sang mahatag nga pinansyal nga bulig sa mga pumuluyo nga nadala sa sunog nga nadala kahapon sang hapon, Pebrero 16.
Sa interview sang Bombo Radyo PB Abelardo Salting Jr. Punong Barangay sang nasambit nga lugar nga wala sang nagakaigo nga pondo ang barangay agud makahatag sang cash assistance sa mga pumuluyo nga apektado.
Apisar sini naghatag naman sang inisyal nga bulig ang City Social Development Office Iloilo City lakip na ang folding beds, foam, kitchen kits kag hygiene kits para sa mga naapektuhan nga residente.
May patigayunon man nga emergency meeting ang mga opisyal sang barangay agud istoryahan ang dugang nga tikang kag posible nga mga bulig nga mahatag pa gid sa mga pumuluyo nga apektado sang insidente.
Nahibaluan nga naglab-ot sa masobra P600,000 ang halit nga ginbilin sang sunog nga nagluntad sa Brgy. Benedicto.
Base sa datos sang Bureau of Fire Protection (BFP) Iloilo City Station, 52 tanan ka balay ang ginlamon sang kalayo kun sa diin 4 ang partially damage kag 48 ang totally damaged.
249 indibidwal naman ang apektado sang sunog nga nagapabilin sa karon sa Multipurpose Building sang nasambit nga barangay.
Sa interview sang Bombo Radyo kay Fire Superintendent Melanie Habawel City Fire Marshall sang Iloilo City Fire Station, iya ginpahayag nga base sa ila inisyal nga imbestigasyon, electrical in nature ang ginalantaw nga ginhalinan sang sunog sa isa ka balay kun sa diin human sa concrete kag light materials ini.
Suno kay Fire Superintendent Habawel, nahibaluan nga wala sang tawo ang balay nga ginhalinan sang sunog.
Pahayag pa niya, wala sang casualties nga narekord apang may ara sang ginrespondehan nga mga indibidwal nga naglain ang pamatyag, napilasan kag minor burns.
Gindugang pa ni Fire Superintendent Habawel, nagapadayon pa sa gihapon ang ila imbestigasyon sa nagluntad nga sunog sa nasambit nga barangay.
