ILOILO CITY – Wala napunggan ni Punong Barangay Noel Soliman sang Rizal Pala-Pala 2, Iloilo City nga magpabutyag sang kalain sang buot tuhoy sa pagtudlo sa iya nga isa sa mga utok sang pagpangilkil sa Iloilo Terminal Market.
Ang nasambit nga isyu ang nagresulta sang pagdapal kag pagpanggan-it sang buhok sang tiayon ni Punong Barangay Soliman kay Barangay Kagawad Gigi Balgos nga isa sa mga ginasaligan ni Iloilo City Mayor Jose Espinosa III.
Sa interview sang Bombo Radyo kay Soliman, iya ginpahayag nga indi matuod nga siya ang utok sa pagpangilkil sa mga manugbaligya sa nasambit nga merkado kag wala siya sang may ginahimu nga kurapsyon.
Ang mala-in lang suno kay Soliman amo nga si Barangay Kagawad Balgos amo ang nagapakala-in sa iya kay Mayor Espinosa nga nagtuga sang eskandalo sa syudad sang Iloilo.
Nagahingyo man si Soliman kay Mayor Espinosa nga indi gilayon magpati sa sutsot sang iban nga tawo kun wala man lang sang pamatuod.
Ginpahayag man sang Punong Barangay nga madugay na niya nga gina-agwanta ang kalain sang buot apang nag-abot na sa punto suno sa iya nga kinahanglan na niya nga magbuya sang pahayag agud nga maklaruhan ang tanan.
Ginpahayag man sang natungdan nga ang utod ni Balgos amo ang nagatakod sang illegal connection sa kuryente sa nasambit nga merkado kag indi siya.
Ang natabo nga pagdapal kag pagpanggan-it sang buhok sang iya tiayon suno kay Soliman ang indi gani makatupong sa ginhimu ni Balgos nga pagpakala-in sa iya kay Mayor Espinosa.
