ILOILO CITY- Nagdepensa si Punong Barangay Virgilio Villanueva sang Boulevard, Molo, Iloilo City angot sa pahayag ni Police Major Marlyn Roquero, hepe sang Molo Police Station, nga napaslawan ang opisyal nga makatambong sa gintalana nga settlement sa inaway sa tunga sang pamilya Baylon kay Agana sa Zone 5 Boulevard, Molo, Iloilo City.
Ini antes ang kamatayon sang iloy nga si Lorry Mae Baylon kag sang iya ginadala nga anom ka bulan nga lapsag matapos gin-alegar nga ginpulihan kastigo sang mag-asawa nga sanday Chona Agana, isa ka maestra sa Molo 1 Elementary School kag si retired Police Staff Sergeant Joseph Agana.
Sa interview sang Bombo Radyo kay Villanueva, iya ginpahayag nga na-late lang siya sang 15 minutos sa gintalana nga settlement sadtong Marso 30 sang hapon, pila ka adlaw makaligad nga natabo ang komosyon sang Marso 24.
Suno sa iya, pag-abot niya sa barangay hall, ang mag-asawa nga Agana na lang ang iya naabtan samtang si Baylon ang gindala sa ospital bangod sa pagsakit sang iya tiyan.
Pahayag niya, ginpaathag nalang niya sa pamilya Agana nga indi madayon ang settlement bangod sa kondisyon ni Baylon.
Nahibaluan nga sang Abril 1, isa ka adlaw matapos ang natalana nga pag-atubangay sang mga natungdan, nagbun-ag sang wala sa oras si Baylon sa iya anom ka bulan nga lapsag nga napatay matapos ang ginabanta isa ka oras.
Abril 2 sang ginbawian man sang kabuhi ang iloy nga si Baylon.
