Apisar wala ang main man nga si June Mar Fajardo bangud sa naangkon nga injury, nagapalangkaak sa gihapon ang abilidad sang San Miguel Beermen sa Philippine Basketball Association (PBA) Governors’ Cup sa pagpanguna ni CJ Perez nga amo ang ginhingadlan nga Press Corps Player of the Week.
Nakuha ni Perez ini nga award sa extended period halin Marso 8-19.
Gingiyahan sini ang second-seeded Beermen tubtub nga nakalab-ot na ang team sa semifinals.
Contender man si Perez sa Best Player of the Conference race nga may average nga 23 points, 10.3 rebounds, 5 assists, kag 3.3 steals sa tatlo ka sunod-sunod nga kadalag-an lakip na ang 121-105 nga resulta sang hampang batok sa Converge nga amo ang nagpalab-ot sa San Miguel sa final four.
Gindayaw ang performance sang Pangasinan native apisar nga kapoy ini sa sunod-sunod nga mga hampang sang nagligad nga tatlo ka semana lakip na ang hampang kaupod sa Gilas Pilipinas sa FIBA World Cup Asian Qualifiers, ang East Asian Super League Champions Week sa Japan, kag ang PBA All-Star sa Passi City, Iloilo.
Ang Press Corps Player of the Week amo ang weekly honor nga ginahatag sang grupo sang print kag online media nga may PBA beat. Nangibabaw si Perez sa iban pa nga ginpilian nga sanday Vic Manuel nga iya teammate, Roger Pogoy sang TNT, kag Christian Standhardinger sang Ginebra. ##
